రాఘవుడే రాఘవి

ఆ పండుగ తొమ్మిది రోజులు ఎవరింట్లో దేవీ పూజ జరిగినా బాల గా నన్ను వాళ్ళింటికి తీసుకుపోయేది మా భువనత్త. నాకు అలా పరికిణి, జాకెట్టు కట్టుకుని ఆ పండుగలలో తిరుగుతుంటే చాలా సుఖం అనిపించేది. ఇలా ఉండగా దసరా అయిపోయిన తరువాత ఆ నెలలోనే బహుళ తదియ నాడు అట్ల తద్ది పండుగ జరుపుకుంటున్నారు. అట్ల తద్ది లేదా అట్ల తదియ తెలుగువారి ముఖ్యమైన పండుగలలో ఒకటి. ఇది ఆశ్వయుజ బహుళ తదియ నాడు జరుపుకోవడం ఆనవాయితీ. "అట్లతద్దె ఆరట్లు ముద్దపప్పు మూడట్లు" అంటూ ఆడ పడుచులకు బంధువులకు ఇరుగు పొరుగులకు వాయినాలివ్వటం పరిపాటి. సాయం సమయమందు వాయినాలు, నైవేద్యాలు పూర్తి చేసుకొని గోపూజకు వెళ్ళి, అటునుండి చెరువులలో కాలువలలో దీపాలను వదలి, చెట్లకు ఊయలలు కట్టి ఊగటం చేస్తుంటారు. నాకు ఆడపిల్లలంతా ఊయలలు ఊగుతుంటే నాకు కూడా అలాగే చెయ్యాలి అని పించింది. నేను అత్తని అడిగాను. అత్త వెంటనే నాకు పరికిణీ, జాకెట్టు తొడిగి ఉయ్యాల ఊగటానికి పంపింది. నాకు గోరింటాకు కూడా పెట్టింది. నా చెయ్యి ఎర్రగా పండటం చూసి నీకు మంచి మొగుడు వస్తాడే రాఘవి అంది. ఎప్పుడొస్తాడు అత్తా? అని అమాయకం గా అడిగాను. త్వరలో చెబుతాను అంది. ఈ అట్లతద్దికే ఉయ్యాల పండుగ, గోరింటాకు పండుగ అని పేరు. నేను నాకోసం అత్త ఏర్పాటు చేసిన ఉయ్యాలలో చాలా సేపు ఊగి, ఊగి నిద్ర పోయాను.